قصيدة مادمت تنشد يارفيقي عن الحال الشاعر خلف مشعان
كلمات قصيدة الشاعر خلف مشعان في شاعر المليون مكتوبة كاملة
مادمت تنشد يارفيقي عن الحال
مالي على كتمانها عنك حيله
الصبر عن بوح الاحاسيس قتال
والبوح في بعض المواقف فشيله
لو كل مايطري على البال ينقال
ماكنت أحس ان الثقيله ثقيله
ابطيت اكافح ضيقة البال بالبال
وادفع بلى هاجوسها كل ليله
لين اقبلت مثل السحابه بهمال
تشفي غليل اللي تزايد غليله
رعادها خيل تدابك وتختال
وبراقها لمع السيوف الصقيله
طاحت ولا اوفق من حناياك منزال
وسع فضى صدرك لـ فيض المخيله
يابدر
يابدر ماني عال لو صحتي عال
شفني من الصدمات نفسي عليله
اشيل حملن لو يشيلنه جبال
الله وامانه غير تصبح نثيله
أرمي .. من هموم الزمن .. واسحب أدبال
وانزل عن ( الجوكر ) وغيري يشيله
من كثر ماشفت بحياتي من انذال ....!!
بديت اشك ان النذاله ... فضيله
ماطاح من عيني رجل ..!! طاحوا .. رجال
ورجال يابن حنيف ماهي قليله
ورجال يا ابن حنيف ماهي قليله
اقرب من اللي قالهم ضمن ماقال ..
راكان ابن حثلين .. راعي الجزيله
هذاولد عم وهذا ولد خال
وهذا .. صديق . ما ندور بديله
سبحان منهو يابدر بدل الحال
وحط الجفا بين الخليل .. وخليله
هذا الزمن يبغاله .. لسان دلاّل
من يستحي هالوقت .. واعزتي له
وقتٍ به ( الراعي ) غدى .. راعي دلال
كلٍ على طاريه .. ينفض شليله ..!!
ومن كان ساسه للردى مضرب امثال
اليوم .. يحسب من كبار القبيله ..!!
المال .. يابن حنيف ملعون .. ابو المال
ذل العزيز .. وعز .. ناسٍ ذليله ...!!
