قصيدة ياراكب اللي ماتعود على الكلف الشاعر عبدالله بن عون
ياراكب اللي ماتعود على الكلف
له عن رخيصات المشاوير كافي
ماقد تلوى في دركسونه الجلف
ولافي جميع محركاته خلافي
ولاعد في الطبلون عداده الا الف
كثير وقته في البوايك وقافي
الا ليامنه طرى الطاري الصلف
عند اللزوم يشال عنه اللحافي
جيب تسابق قومته نقرة السلف
من مصنعه صمم لقطع الفيافي
بينه وبين انخافة أهل الهوى حلف
من جاه لوهو يشتغل قال طافي
مايسمع البستم ولايسمع البلف
الا نخالا مثل ما قال لافي
بيني وبينه مع فجوج الخلا ولف
عساس والا قدم عسم الخفافي
اليا سرح صدر النهار اخره يلف
اهل البيوت مرفعات الرفافي
احفاد مروين المزاريج والشلف
يوم المصافق عند حم الشعافي
لين استحلوا بالشفى مرتع الخلف
وضافوا على المشقوق الاسم الاضافي
قوم ظهور الخور لصحونهم علف
ذباحة المردم بوقت الجفافي
مجازر يجلب لها الخف والظلف
نقذة عرب يوم السنين العجافي
